Work Text:
唔經唔覺，政政男神同煩膠仔已經拍咗拖十年，由Year 1誤打誤撞成為男男朋友，到一齊踏入社會都五、六年。
畢業後，Tine入咗大公司法律部工作；而Sarawat冇搞政治，亦冇加入政圈呃飲呃食，反而選擇留喺大學繼續讀書，依家喺大學做緊講師，時不時上節目做嘉賓論政同發表意見。
兩個人吵吵鬧鬧，但關係依然如膠似漆。
直到有一日Tine喺Sarawat返工個袋入面發現咗一封粉紅色嘅信，仲用心心貼紙封口。
其實佢都知自己男朋友有幾受歡迎，唔同系嘅學生reg唔到都要入嚟sit堂一睹廬山真面目，畢竟Sarawat係號稱全大學最靚仔嘅lecturer，仲要有料唔係得個樣。
Sarawat沖完涼，一邊用毛巾抹頭，一邊行入房。
「收到好多情書，又有朱古力，好受歡迎喎。」
「唔係啦，你知我個人幾咁求其㗎啦，啲野成日都周圍放，班學生趁我唔為意偷偷地塞落我個袋。」
Tine唔出聲。
「做咩呀？呷醋呀？」Sarawat放低毛巾，坐喺床邊問。
Tine唔好意思開口認，擰歪面唔望對方：「唔知，瞓啦。」
過咗幾日，Tine食食下飯行咗入房。
「你去邊呀？食飽啦？」Sarawat問。
「未，你等我一陣，有野俾你。」Tine拎住一個好細嘅紙袋行出嚟，然後遞俾Sarawat。
「咩嚟㗎？」Sarawat望一望，入面係一個首飾盒，佢拎出嚟打開發現一對款式低調嘅戒指。
「戒指？送俾我嘅？」Sarawat又驚又喜。
Tine接過Sarawat手中嘅首飾盒，拎出其中一隻戴喺對方中指，大細剛好。
「我唔係唔信你，只係有時我會有啲患得患失，」Tine輕輕轉動戒指，繼續講：「雖然喺泰國我地仲未可以結婚，但係有戒指個個就會知你係有人mark實咗，所以你唔準除呀，除咗我呢世都唔會再理你。」
「點會除，但係呢啲嘢應該係我買。」 Sarawat反手將Tine嘅手拖實。
「我喺床上面俾你食住啫，但呢啲野我都可以做主動嘅。」Tine笑住咁答。
Sarawat拎出另外一隻戒指，為對方戴上，然後鄭重地喺上面落下一吻。
「我愛你呀煩膠仔。」