Work Text:
Tine拎起放咗喺飯枱嘅潤膚露，忍唔住反咗個白眼，講：「Wat，叫咗你將啲嘢擺返好，次次用完又就咁擺喺度。」
「是但喇，用完咪順手放喺度囉，一陣擺。」Sarawat手指霹靂啪嘞咁喺鍵盤上打字，對眼冇離開過螢幕。
「你次次都係咁講，有邊次真係做到？成日都冇句真，放少少嘢好阻到你咩議員。」Tine見Sarawat冇反應，又一輪嘴咁講落去：「屋企整齊啲唔好咩，同你一齊住咗咁多年，洗衫你又唔反轉件衫，叫你分開洗衣籃你又唔肯，個屋企你有冇份㗎。」
Tine拎住枝潤膚露放返入房，個嘴依然唔停：「我知你做嘢好忙，但我喺律師樓都好忙㗎。我覺得好似得我一個為屋企付出咁。」
聽見Tine不斷嘮嘮叨叨，原本清晰嘅思路開始變得紊亂，論據邏輯亦都變得唔通順。被打擾工作嘅Sarawat終於抬起頭，反駁一句：「你成日都嘈呢啲小事煩唔煩嘅啫，你唔煩我都厭喇，你估我喺議會好得閒咩。」
Tine聽到呢句就火都嚟埋：「下？啫係我喺律師樓就日日un un腳唔洗做？搵錢好容易？你為緊社會大眾做事嘅同時我唔係？你咁講係咩意思？」
Sarawat心知不妙，知道自己口快快講錯嘢傷害到Tine，嗱嗱林補鑊：「我唔係咁嘅意思……」「你講得出即係有諗過喇，同你一齊咁多年你當我係工人？係囉拍咗咁多年拖，聽到我把聲、見到我個樣都會厭㗎喇係咪呀。」
Sarawat將電腦蓋上，起身行去Tine身邊，Tine退後咗一步，瞪大對眼講：「咩呀，想打我？講還講，唔好郁手呀下，我告……」Sarawat伸手㩒住Tine嘅後頸，錫落去Tine喋喋不休嘅嘴唇。
「你做咩啊，我都未話完……」Tine嘢都未講完Sarawat又再錫多啖，今次仲伸埋條脷勾引對方。
「你係咪仲有嘢講？好多不滿？講一樣錫一啖。」Sarawat一邊講，一邊哄埋去Tine個嘴。Tine即刻舉起手掩住對方個嘴，話：「喂好唔公平啫，同你講緊正經嘢你一嘢錫埋嚟當冇事發生過？」
「呢個都算係不滿，我動議Sarawat可以錫多啖。」
「反對，與案情無關。」
Sarawat攬住Tine條腰，將個頭埋喺Tine頸側，一邊輕吻一邊含糊地講：「唔緊要喇，下次再拗過。對唔住，我成日都記唔住呢啲小事。頭先唔係有心咁講，最近準備質詢，壓力有啲大，躁底咗少少。」
Tine輕嘆了一口氣：「你次次都係咁，點解我仲未飛你。」
「因為有愛囉，愛就係會包容對方、遷就對方，最重要係你唔捨得我俾到你嘅嘢，今晚幫你溫習下？」