Work Text:
「Tine！」
「Wat？今日咁早嘅？」
在上課鈴響起前見到Sarawat 已經在學校出現簡直是天荒夜談，然而今日卻發生了。
「無呀，今日校慶，AV學會要幫手整下音響嗰啲嘢，所以咪要早啲返囉。班細嘅話唔識整，麻鬼煩！」
眼前這個黑黑實實的男生是我的死黨兼校內萬人迷暨音響學會會長，與我這個白白淨淨文弱書生型的學生會主席，簡直是兩個極端。我倆由初中相識，事緣於班主任一次忽發奇想，用小名的第一個字母排座位，所以Ｓ字頭的他和Ｔ字頭的我便坐在一塊。由那時開始，我們逐漸由日常的爭吵變成同學間的小打小鬧，再自自然然成為了死黨，即使後來我們之間多了叫Sky、Tay 等的名字。
「喂，你陣間咪要上台講嘢嘅，順便嚟幫我試下啲聲啦。」Wat 說畢就搭著我膊頭走向禮堂。我們並肩而行時，Wat 突然用食指點了點我的面頰，「你做咩今日有黑眼圈嘅？尋晚好夜訓咩？」
我用手搓了搓他剛剛摸的位置，順便使自己清醒一點，「係呀，尋晚要做電影份功課，Miss 要我地睇套戲再寫返賞析。」
「我都唔明你嘅，明明想做律師，做咩electives走去讀電影？」
「電影先係我興趣，而讀 Law係屋企人嘅期望啫。你夠話要從政啦，咪又係走去搞AV！」
「我點同呢？係男仔都鍾意AV 㗎啦。」 開著男性間玩笑的Wat 真的很幼稚，怎麼跟在別人前一副孤高的樣子落差這麼大⋯⋯
一邊說著無聊的對話，一邊步進空無一人的禮堂。早晨金黃色的陽光斜斜從落地玻璃窗照入，在光線中看到飄浮的微塵。看著Wat在台上調較著咪架的位置，走來走去的接駁著音線，陽光灑在他身上，銀邊勾勒出他的身影。嗯，難怪能成為校草。
「Testing⋯⋯One, Two⋯⋯」Wat測試麥克風的確已經開啓後，便指示我站到台上。「嚟，Tine，試吓講嘢或者唱幾句歌？」
「吓，我唔識唱歌㗎喎！」痴線，一大早在禮堂唱什麼歌。
「咁求其講幾句啦。」Wat 轉身走向控制台調校音效。
「哦⋯⋯ 」要我即時說些什麼，其實也不太想得到，腦中只浮起昨晚看的電影裡的一段對白。「有時候，我覺得耳朵比眼睛更重要。」望著平日坐滿一千二百人的禮堂，現在只有一個人。我合起雙眼，「好多嘢，用耳朵聽比用眼睛睇仲好。就好似一個人唔開心會扮到好開心，但聲音係扮唔到嘅*⋯⋯ 」
「咁你聽唔聽得出我而家開唔開心呀？」黑暗中傳出一把聲音。
原來是真的，就算看不見，也能聽得出這個ＭＫ仔話裏滿是笑意，不是恥笑，而是愉悅。只是為什麼⋯⋯？
我望向正在控制台位置調較著音響的Wat，隱約在黑暗中望到他瞳孔的反光，他在望著我。
「喂，試夠未啫？」
「OK 啦，落嚟啦！」
我朝著控制台位置走過去，微微瞇起眼睛也看不清在朦朧中低頭忙碌的Wat。
「Tine 你把聲真係好入咪，唔怪得平時啲老師成日搵你讀報告啦。」Wat 在我面前這樣解釋，但我好像看到他的耳廓有點泛紅。「第時做律師要上庭盤問，個犯一定俾你把聲迷到乜都講晒出嚟。又或者個官一定會信晒你份結案陳詞。」
「會唔會呀？」我有點想作弄他，便湊近他發紅的耳朵，「咁法官大人，我懇請你要求Sarawat每日都交齊功課，乖乖地溫書，唔好成日臨考試先要搵代表律師幫佢補習。」我在他耳邊細聲說話之際，也聞到他髮泥中淡淡的蘋果香。
「死仔，」啪一聲傳來的同時，屁股上有輕微的痛感，癢癢的讓人想抓一下。「去上堂啦！」Wat 摟著我膊頭步回班房，「咁我而家宣判，代表律師你每晚打俾我讀書俾我聽，我咪肯乖乖地溫書囉。」
不用望，都知這人的嘴角一定是單邊向上。
*對白出自於《春光乍洩》中， 張震與梁朝偉在酒吧中的對話。