Chapter Text
「大家注意，呢位係新同事Anson，主要負責lead你地成Team，同direct report俾我既。」經理Darren從經理房走出，盧瀚霆伴隨在身後，他邊說邊搭著盧瀚霆肩膀。
「呢個office唔算大，所以位置黎講，你會坐係近窗既位置，望向四位Teammates。」說後指一指呂爵安，「Edan，你幫手帶一帶佢四圍行下，簡單介紹下啲同事同基本公司野？」
剛從洗手間回來的呂爵安，只呆呆地盯著盧瀚霆沒回話，「唔洗麻煩到大家，岩岩reception個位April，話會帶我行公司一次。」盧瀚霆把Darren的手指推向下，打個圓場。
呂爵安立刻走到盧瀚霆與Darren的中間，從而把兩人分隔開，拉著盧瀚霆到他的位置，「放低個袋，跟我行。」
盧瀚霆努力造出和藹可親的笑容，「你好呀，Edan，我叫Anson盧瀚霆，多多指教。」伸出想對方握手，呂爵安則無視他的行為，自顧自往茶水間走去，盧瀚霆吐吐舌頭便收起手跟著他。
「Edan對新同事怨氣有啲重喎？」
「可能佢諗住自己有得升呢…」
「平時見佢都好好禮貌㗎...」
見好戲的幾位女同事目送二人離開，便七嘴八舌地討論著。
--
「你到底返嚟做咩？明明個時你已經做左選擇...」 呂爵安讓盧瀚霆走進茶水間，便把門關上，一個壁咚把人推至牆邊，「仲有，岩岩Darren搭你膊頭做咩唔縮開，佢專抽人水㗎！男女通殺呀！你仲掂佢條手。」另一手握緊剛剛觸碰到Darren的手。
幾年不見，還是那個又愛又恨的哥哥，那個在自己生命不斷來去自如的哥哥。呂爵安一直想盧瀚霆回來，但又一直不想再面對他，更沒想過以這形式再相見。
盧瀚霆吐吐舌，無視對方的問題。把呂爵安的手拍開便走向咖啡機，看看有哪一款咖啡膠囊是自己喜歡。
呂爵安隨手拿起一款，弄出一杯濃縮咖啡，加入朱古力醬，再把剛打起的奶泡倒進杯子，遞給盧瀚霆--從前，哥哥只愛喝自己泡製的朱古力咖啡。
接過溫熱的朱古力咖啡，盧瀚霆輕輕地喝下一口，仍然是那懷念的味道。幾年沒喝咖啡，只為埋藏著那眷戀的甘甜。弟弟仍然記得自己不愛咖啡的苦澀，只愛香滑甜美的朱古力咖啡。
一杯只為哥哥才調配的咖啡，心滿意足的盧瀚霆幽幽地笑著望向呂爵安，「都仲係咁好飲，手藝無生疏到喎，成日沖俾女朋友飲呢？」
「我問你既野，又唔見你答我？」生悶氣的呂爵安撟起雙臂，挨在鋅盤旁並望向玻璃窗，「我有無女朋友，關你事咩？我講過，你個日唔出現，我同你就唔再有任何關係！」
「咁...無關係未即係新開始囉？」看著呂爵安的微表情，清楚了解到他還著緊自己，盧瀚霆如釋重負，把最後的一口全喝下，「不過好可惜，我同你，呢世都係兄弟，唔係你話斷就斷。」跨過呂爵安身旁時輕聲地說，「你亦無辦法離開我。」
把門打開，「帶我行個圈，順便見下你個新女朋友。」盧瀚霆伸出邀請的手勢，呂爵安則不情不願地離開。
「我都無話過自己有...女朋友...」 呂爵安細細聲地說著。
從來，弟弟都總說不過哥哥。
從來，弟弟都只會讓著哥哥。
待續
--