Work Text:
新居 《星Sirius》
電視劇"大叔的愛"剛剛播出大結局。
「Anson Lo，落左妝未呀？」
「未呀！啱啱先offline咋喎，邊有咁快呀！」
「出嚟食糖水呀？」
「吓，你唔係啱啱返到屋企咋咩？又出嚟？」
「搭uber咋嘛！嚟喇！當慶祝吓田牧終於可以一齊囉！」
「唔…是但喇！去邊度食呀？」
「我宜家幫你call車！」
手機傳來圖片，是uber的車牌。
「7分鐘後到。」
盧瀚霆難得有一天不用到凌晨才回到家，
本想好好地享受ME Time，
是呂爵安的一句「田牧終於可以一齊」令他不自覺地答應了。
「Hello! 凌生？」
盧瀚霆遲疑了一秒，「係呀！唔…我想問係去邊？
因為係我個friend幫我call…」
「你個friend remark左話唔洗話你知，睇嚟佢想俾驚喜你！」
「哦…咁要幾耐到？」
「大概25分鐘喇！」
「嗯，麻煩晒！」
盧瀚霆合上眼，腦海浮現的是…呂爵安又搞乜鬼！
「凌生，到喇！」
剛睡醒的盧瀚霆扶了扶帽子，睡眼惺忪，
看到車窗外漆黑一片，「吓？到？」
手機響起，
「唔洗驚喎！唔係賣你豬仔喎，落車喇！」
「呂爵安，你搞乜呀？」「大帽山道？咩料呀？夜媽媽走上嚟！」
七月大帽山的晚上，去掉了白天的炎熱，
偶爾颼颼的風吹來，帶來一絲涼意。
呂爵安把風衣套在盧瀚霆的身上，拉上拉鏈，蓋上帽兜。
「行喇！」
「痴左線呀你！去邊呀？」
「睇星星！」手電筒影照著前方，漆黑的道路上只剩一束光。
呂爵安拉著盧瀚霆的手臂往上行。
「喂呀！行幾耐架？咁黑你識唔識路架？
死喇！唔知電話收唔收到…」
草叢中野豬的一聲叫喊，「頂！咩聲呀？」
盧瀚霆緊緊地抓住了呂爵安。
「Anson Lo你唔好咁港女喇！」
「夜媽媽帶我去睇星你唔MK嘅…」
「唔通日抖帶你嚟咩，港女！」
盧瀚霆給了他一個白眼，但手卻未離開…
上弦月高掛，微微的銀白光影譜寫在地上，映照著依偎的身影。
盧瀚霆低頭看著倒影，安心地把頭靠在呂爵安的肩上。
寂靜的夜裡，身體依靠著的溫暖，環繞著盧瀚霆獨有的味道，
淡淡的木香混合郊外的青草味，心頭一股溫熱，
瞬間把呂爵安一整天的疲勞消掉。
「你睇下！」
盧瀚霆抬頭，眼光順著呂爵安指給他的方向，
「嗯…好耐都無見到咁多星星喇…」
漫天繁星，閃閃發光，恆河沙數的星體交織出瑰麗的銀河，
夜空中的星斗閃爍著，散發著若隱若現的光芒。
「坐哩度呀！」
呂爵安細心地找了一塊平坦的大石，二人席地而坐。
「多謝你呀呂爵安！」
盧瀚霆仰望著浩瀚的星空，「你記住左我講嘅野…」
呂爵安會心一笑，「你有冇見到嗰度有粒好光嘅星星？」
他從旁看著盧瀚霆完美無暇的側顏，
深邃的眼眸，高挺的鼻子，紅潤的雙唇，分明的下顎線，
修長的指尖點算著滿天的星星，
「係喎！真係特別光！係咩星嚟架？」
盧瀚霆彷如小孩般手舞足蹈。
他回頭對上呂爵安清澈的眼眸，空氣凝結， 「天狼星。」
只有零點一公分距離的手被呂爵安拉近…
「天狼星係距離地球最近，最光嘅恆星。
佢係一個雙星系統，一粒叫”天狼星A”，一粒叫”天狼星B”，
佢地之間嘅距離只有十幾角秒。
”天狼星A”係主序星，”天狼星B”係伴星，
佢隱藏喺”天狼星A”附近，兩粒星互相依偎，圍繞住對方運行。」
盧瀚霆看著天狼星，安靜地傾聽著。
「盧瀚霆，我想做守護喺你身邊嘅”天狼星B”。」
盧瀚霆收起了被呂爵安緊握的手，一副事不關己的樣子，
「講講吓星無啦啦講左去邊呀？」
「盧瀚霆，我認真架！唔…
我之前一直都唔敢去面對自己對你嘅感覺…
點講呢…由造星一遇返你開始，我覺得：咦！咁有緣份嘅；
到造星二，我哋經歷左好多，你為我做嘅一切，我都記得好清楚；
我一直睇住你承受咁大嘅壓力，咁多閒言閒語，我好想去保護你，
我好想企喺你前面為你擋流言蜚語，
我好想喺你身邊為你分擔一切，我好想喺你背後做你強大嘅後盾
但係…當時我又唔知應該用咩身份去咁做，
或者係我無勇氣去承認自己嘅感覺。
我曾經好天真咁話俾自己知你係我兄弟，
我係可以為你做任何野，但係直到拍大叔，
我清楚知道我對你嘅感覺係愛情而唔係友情…」
晶瑩的淚水在眼眶打轉，「你同我唔同，我係男人…」
「係男係女有咩分別？我淨係知道我時時刻刻都想見到你，
見到你我又會想一直痴住你，痴住你之後我又會想可以拖住你，
拖住你我又覺得唔夠會想攬住你…我愛嘅係你成個人，
而唔係你嘅性別，我淨係知道我想愛你，我需要你！」
「唔係咁架…唔係咁架…」盧瀚霆賣力地搖頭。
呂爵安用指腹輕輕擦掉盧瀚霆臉上的淚珠，緊握著他的雙手，
「跟住你又會想話我係未出戲，但係我可以好肯定咁話你知，
哩一刻我真係呂爵安，喺我心入面你就係盧瀚霆！
由當初相識相知開始，你就係我嘅主序星，我係你嘅伴星，
我地嘅重力互相影響，我地共同經歷緊彼此嘅人生，
即使宇宙間有無數嘅星體，我，呂爵安淨係想跟隨住你。
你仲記唔記得我曾經問過你，
點解你行哩條路咁辛苦你仲可以堅持行落去，
嗰一刻你講左一句 “你必須很努力，才能看起來毫不費力”。
我一直都有好好記住哩句說話，
我一直好努力好努力就係想跟上你嘅步伐，
我想留喺你身邊同你一齊發光發亮。」
淚如雨下的盧瀚霆被呂爵安一擁入懷，
「我愛你，可唔可以？」
埋首於懷中的他總於點了頭。
呂爵安雙手捧著盧瀚霆的臉頰，一點一點地吻著臉上的淚痕，
「我唔知道一生一世係咩概念，
但係至少哩一刻我想擁有你，佔有你。」
呂爵安說罷便狠狠地吻上了盧瀚霆的唇…
一顆流星劃破了漆黑，夜空中留下了一道美麗的長弧。
天狼星的質量比太陽還要大，
主序星”天狼星A”的能量主要來自伴星”天狼星B”。
就是因為有”天狼星B”的存在，才成就了”天狼星A”。
隨著能量加劇，”天狼星A”最終有機會變成一顆紅巨星，
而”天狼星B”在質量上的急劇變化，
最終也會承受不住，發生超新星爆發。
最後…一切灰飛煙滅。
但將來…又有誰能說得準…
「呂爵安，我地點走呀？
半夜三更荒山野嶺，你覺得會call到uber？」
「唔…我嚟嗰陣又真係無諗過哩個問題…」
「唉…成件事好呂爵安囉！」
嘟…嘟…嘟…
「喂！AK你瞓左未呀？」
- END -