Chapter Text
呂爵安第一次與盧瀚霆見面，是在工作的時候。
『先生你好，請問有咩可以幫到你?』呂爵安問。
眼前來的一位客戶，頭戴著黑色漁夫帽，黑色長袖襯衫配黑色牛仔褲，黑色口罩早早遮去大半個臉容，只露出一雙有濃密而幼長眼睫毛的眼睛。
『你好，嗯，我部手機壞左，唔知可唔可以整番?』
這位客戶很斯文有禮，而且呂爵安覺得他的聲音很磁性，令他不禁偷望眼前這個男人。
『請你等等…』呂爵安拿起手機，查看了手機型號。『請問你記唔記得，最後一次用既時候，部手提電話有冇出現過D咩異常情況?』
『嗯…好似冇咩特別…總之，我尋晚當我想再開番機既時候，佢就完全hang左冇反應，開唔到…』盧瀚霆很努力地回想昨晚事發經過，他只是跟經理人和工作人員一起到日本餐廳吃鐵板燒晚飯，當時經理人還能用他的手機拍下短片，然後上載上Instagram。等到他回家梳洗後，才發現手機出問題了。
『好，請你等等…』，呂爵安飛快地在鍵盤上按鍵輸入有關資料。
『我已經成晚不停咁去試啦，係咁boot機希望可以再開機，但都係唔得…我…我仲試埋將部手機放入米缸到…』
『吓? 米缸?』呂爵安其實不太驚訝，這個謬誤其實很多人都以為有效。
『咁…我以為部電話因為天氣太潮濕，搞到部機hang hang 地，D人係咁講話work架…』
呂爵安初部檢查了電話既情況，擔心比預期中嚴重，『嗯，先生，初步嚟睇可以修復既機會唔多大喎。』
『吓? 我部機買左幾個月咋喎? 點解會咁架?』盧瀚霆如像熱鍋上的螞蟻，一想到自己手機裡所有相片，拍戲時錄下的footage，還有密碼等資料將無法復原，他差一點便想昏倒了。
『先生，我地會先幫你detail check下部機先，麻煩你等一等? 你可以去嗰度坐坐先吖。』
『咁好啦，唔該哂你。』
呂爵安拿起手機，熟練地在工作桌上把手機接駁電線，開始檢查。
大約10分鐘後，呂爵安手拿了手機回到客戶服務櫃枱，跟盧瀚霆簡單交代初步的檢查結果。
『暫時應該都唔係有太大問題既，部機呢…其實係開到既…』
『開到? 真架? 真係開到?』
『嗯，你睇睇….』
當盧瀚霆看到手機螢幕終於不再黑漆漆了，他實在高興到叫了出來，口罩完全遮掩不住他興奮的笑容。
雖然盧瀚霆戴著口罩，但從他的眼眸裡，呂爵安能感受到他是多麼的興奮和高興。
『啊! 太好喇…』盧瀚霆著實感到鬆一口氣，不禁大聲歡呼。
『不過，你部機…真係好慢…如果以一部都幾新既手機嚟講。』
『吓? 點解既?』盧瀚霆天真地瞪開了眼，望著呂爵安問。
『你部機…嗯，簡單D咁講，你save咗太多files，例如相呀、片呀咁，部機既儲存空間係完全嚴重不足，根本再冇空間俾佢run其他既function仲有apps…』
『吓? 咁係咪我D相同video會冇哂?』盧瀚霆彷似由天堂一下子又跌進地獄。
『咁又唔係…不過最好真係back up左成個相簿同D重要files，仲有一D你成日用既apps，例如whatsapp呀咁，因為真係唔知下一次會唔會咁好彩可以開到機。』
『乜可以back up架?』
呂爵安心裡想，咦，條友真係唔識架喎? 『你…有冇聽過icloud? 嗯? 又或者google drive?』
盧瀚霆瞪大眼睛，彷彿聽到另一個宇宙新事物一樣。『我知有google drive，但我唔明D相點upload上去? 個相簿點up上去? 』
『咁不如我教你一次? 首先呢你要㩒入去呢度…』呂爵安開始仔細的講解。
大概5分鐘後。
『嘩，原來可以咁架?』盧瀚霆的反應有如發現新大陸一樣，這刻他發現自己反應好像有點誇張而感到尷尬，幸好有口罩遮蓋著他微微泛紅的臉頰。
『嗱，你之後就算再換新手機，只要入番呢個account，就可以轉番哂D相呀片呀咁架喇。』呂爵安完成細心的示範後，叮嚀盧瀚霆，『嗯，不過你部電話舊電都最好換左佢，我建議你趁今次換埋佢，咁之後就唔駛黎多次。』
『好呀，唔該哂你。』
『唔駛客氣。』
『咁我想問我可以幾時可以拎番部電話?』
『都好快，聽朝就可以拎得到。』
『好呀，真係唔該哂你。』
『先生可唔可以留低你個名同聯絡電話? 貴姓? 』
『好呀。我姓盧，Anson Lo。』
『Okay，盧生可以留一留個contact吖…』
知道手機問題不大，盧瀚霆算叫做放下心頭一件大石。
從背包拿出剛才寶姐借給他的後備手機，盧瀚霆致電給經理人，『喂? 花姐? 聽日先有得拎呀。嗯，我而家準備行出去Apple store。知道，我會小心，一陣見。』收線後，盧瀚霆走近顧客較少的側門，從側門離開商店，登上早已泊在路旁的保母車，會合經理人和助手。
『真係放入米缸架喎? 咁cute既咩?』呂爵安想起剛才的客人那個慌張而可愛的眼神，忍不住笑了一笑。
『下一位呢度吖。小姐你好，請問有咩可以幫到你?』