Chapter Text
班星崖村，村名已經顯示咗，呢度係個觀星嘅好地方。夜幕降臨後，一抬頭就見到漫天璀璨嘅星星，繁星同銀河將人包圍住，令人感覺彷彿置身於浩瀚宇宙之中。人同天空嘅距離近到好似伸手就能夠摘下天上面最閃嘅嗰粒星，然後送畀你最中意嘅人，等粒星見證你哋嘅愛情。星星可以講係班星崖村最唔缺嘅嘢，而呢度亦有個同星星有關嘅傳說，聽講數夠一千粒星，願望就會成真。
鄉村最吸引人嘅地方就係佢獨有嘅風土人情，呢度生活純樸，個個都敦厚老實，唔似得都市人噉爾虞我詐。呢條村住咗100人都唔夠，村入面家家戶戶都互相認識，村民之間相處得好融洽，大家會守望相助，所以班星崖村冇乜紛爭，亦都從來冇發生過罪案。
直到－－
「咯咯咯咯－－」
「啊！！！！！」
雞啼同尖叫聲一齊喺清晨5點半響起，劃破咗朝早嘅寧靜，一人一雞嘅聲線展開咗班星崖村新嘅一日。
農村居民過住日出而作，日入而息嘅生活。好多人喺呢個鐘數已經開始做嘢，聽到如此慘烈嘅尖叫聲，大家都紛紛放低手頭上嘅工作去睇下發生咩事。
Tian亦都畀呢一下尖叫聲嚇醒，佢頭都梳唔切就急急腳衝咗出去想睇下係邊個晨早流流嘈生晒。
「頂，你嚇死人咩隊長。」佢一開門就見到Phupha成尊佛噉企喺門口。
Phupha見到Tian未瞓醒嘅樣忍唔住輕笑，然後再出手將Tian頭上本身已經好亂嘅鳥巢再摷亂啲。奇景，Tian竟然會任由Phupha蹂躪佢個頭而唔反抗，佢應該真係未瞓醒。
「行啦，去睇下咩事。」Phupha終於記得有正經嘢要做。
佢哋會合埋為咗逃離繁囂都市，趁住sem break投奔大自然嘅Tul就一齊去搵尖叫聲嘅起源地。行咗一陣就發現喺不遠處有一堆人圍咗喺村長Khama屋企前面。
「嗚嗚……靜雞雞唔、唔見咗呀……」村長個女Rima喊到上氣唔接下氣。
Rima養咗兩隻同一品種嘅雞，一隻叫靜雞雞，一身灰色嘅毛，灰色嘅羽毛之中又夾雜住啲白色嘅羽毛，遠睇就似白色嘅斑點，佢比較我行我素，有時仲會好曳噉啄餵食嘅人。另一隻叫靜靜雞，同靜雞雞唔同嘅係，佢嘅羽毛係啡色嘅，同埋佢文靜啲又親人啲，任抱唔嬲。
呢兩隻雞深得Rima厚愛，錫雞嘅佢特登喺屋企隔籬劃咗塊空地去養佢哋，餐餐都服待周到，差在未餵埋入口。
Rima每朝都係聽住兩隻雞嘅雞啼二重奏起身，而今日佢只聽到一雞獨鳴，有啲不安嘅佢即刻走出屋外睇下點解得返一把雞啼，果真發現雞棚入面得返叫得起勁嘅靜靜雞，灰色嘅靜雞雞就不見蹤影。
見到Rima喊得咁悽慘都知佢真係好愛靜雞雞，大家都忙住安慰佢，唯獨是Rang一個人好忙噉喺雞棚兜兜轉轉，望嚟望去，佢若有所思噉摸摸下爬。
「咳咳，大家聽一聽禾講。」Rang整理好思緒就發言。
所有人都將視線集中喺Rang身上，連喊緊嘅Rima都唔例外。
「禾頭先檢查過啲圍欄，冇損毀嘅跡象，證明個賊做事小心謹慎，偷雞嘅過程入面冇整爛周圍啲嘢，亦都冇留低任何痕跡。」Rang分析得頭頭是道。
「犯案時間應該大概喺夜晚10點至清晨5點之間。而禾哋呢條村咁偏僻，都唔會有人特登入嚟淨係為咗偷雞，基本上可以剔除村外人呢個選項。綜合以上種種證據，禾可以肯定……」
「犯人就喺禾哋當中！」Rang金田一上身噉下定論。
Rang嘅推論引起一片譁然，零罪案嘅村莊竟然發生咗史上第一單偷竊案，個犯仲要係村內人，呢樣嘢更令大家感到心寒。
呢一刻，班星崖村雞心惶惶。
到底係邊個偷走咗靜雞雞？