Chapter Text
盧瀚霆是一個長期缺乏信心但又自尊心極強的月光族，他繼承父母留下的衣缽，成為了一個「風水師」。不過，他學藝不精，唯有靠天份及聰明頭腦來討兩餐，但他絶對不會做傷天害理的事。
「霆仔，今日想食咩？」茶餐廳老闆放下一杯溫水給盧瀚霆。
「一杯熱鮮奶得喇，唔該。」盧瀚霆靦腆的看著老闆。
老闆搖搖頭離開，走到廚房親自為盧瀚霆預備熱鮮奶。
「霆仔，淨飲雙計架！」老闆放下一杯加了雞蛋的熱鮮奶及兩片多士。「好心你一係正正經經搵番份工，一係就慳啲洗，唔好買咁多名牌啦。你老豆老母唔係留咗幾億身家俾你架，你話你自己宜家掙落幾多卡數吖？我每日俾多兩塊多士你有咩所謂，但咁對你真係好咩？唉……」
盧瀚霆當然有想過找一份工，但對一個中五已經綴學的人，還可以找到一份薪高糧準的工嗎？倒不如繼續渾渾噩噩，幫人「種生機」、「擺風水陣」、「作法轉運」。
吃過那唯一一餐後，他到收銀枱，放下一杯淨熱鮮奶的錢，向老闆道謝後，便憂憂地離開茶餐廳。
「呀…錢呀…我要錢呀…」
「安少，你究竟要俾人偷幾多次車先安樂呢？今個星期已經第三次喇！」柳應廷陪呂爵安於警署錄畢口供，「一係你就唔好再自己揸車，一係就買架低調啲嘅車，我真係唔多想成日出入差館架！」
呂家三代做豆品生意，家底豐厚，業務遍佈東南亞，但呂爵安這第四代，對家族生意毫無興趣，每天都只是四處遊蕩。無知傻腦沒有架子的他，身邊不乏朋友，但除了柳應廷，均一都是貪圖他的錢財，他也當然是知道的。
「唉…我都唔知點解呢排咁黑仔，少至日日踩狗屎，大至一星期唔見三架車，無啦啦被人派帽都冇謂提添。」
無意中聽到這番對話的盧瀚霆眼球一轉，“有飯開！”
他跟隨他們來到車行，沿路觀察呂爵安的一舉一動。
“大佬，你行路掛住㩒電話，唔怪得踩金多過執金啦！”
呂爵安剛接近車行五十米距離，兩名掛滿笑容的職員已開門迎接。
「安少，柳生，今日想睇咩車？」
「唔……我想試下呢架瑪莎。」呂爵安掃著太空灰的車頭蓋。
「都叫你揀啲低調啲囉。」柳應廷對這個選擇反了個白眼。
「吓？呢隻色仲唔夠低調？」呂爵安搔抓著頭髮。
「大佬呀…唔係顏色問題呀…係車款呀！」柳應延指著另一車款，「唔該，俾安少試呢架吖。」
「呢架？」呂爵安及兩名職員同時說道。
「有問題？」柳應廷怒視兩名職員，「係架車有問題，定你哋有問題？」
「冇……冇問題，我即刻攞車匙。」
「喂柳爺，宜家係我揸喎，做乜你幫我決定？」呂爵安不滿地望著那黑色的Audi房車。
「你唔想再俾人偷車，你就聽我講買呢架。」
盧瀚霆雖然站在門外聽不到他們的對話，但看著他們的肢體語言，大概也猜得七八成。
“呢條友都幾捨得洗錢，不過嗰個木嘴就難搞啲。”
他倆試過車回來後，呂爵安一股腦兒離開座駕。
「妖！架車慢到死，我行路仲快過佢！」
「喂！你又唔攞番車匙！」柳應廷又破口大罵。
“唔怪得你成日俾人偷車啦！” 盧瀚霆心裡說著。
「安少，架車啱唔啱心水？」雖然佣金少了一大截，但想到豐厚的小費，職員都不敢怠慢。
「唔知呀！是但啦！」呂爵安瞪了柳應廷一眼。
「咁我哋一陣搞埋啲手尾，聽日安排將架車送到府上。多謝安少。」
呂爵安放下兩張五萬元現金支票，給招呼他倆的職員。
一直在門外監察的盧瀚霆，待他倆乘的士離去後，推開車行玻璃門入內。
「先生你好，想搵咩車呀？」
「我係安少助手，佢叫我攞番頭先張送貨單嘅copy早啲返搞公司行政嘢。」盧瀚霆不徐不疾的說道。
「好，請你等等。」
“呢啲sales佬，有錢落袋就老母係邊個都唔知！講兩句你就信。”
盧瀚霆上網查看前往「金礦」的方法：乘坐約一小時的巴士，再徒步半小時。
“為咗錢！加油呀盧瀚霆！” 半小時的腳程，盧瀚霆心裡不斷默念這番話。
「嘩……我係咪去咗世外桃源？使唔使咁chill呀…」
眼前一排不算密集的獨立屋，依海而建，環繞三個周邊都是茂密的高樹，私隱度極高。
盧瀚霆終於找到「金礦」的位置，打算倚在大樹下稍作休息，突然大屋門外傳來一陣騷動。
一位身材姣好的女子，氣沖沖的拖著行李箱出來。「花姐，你幫我同你少爺講，唔好諗住俾三十萬我就大哂，宜家係我飛佢！」
「張小姐，其實少爺俾三十萬你真係唔啱……換轉係我？一蚊都唔會俾你！你派綠帽俾少爺，仲要惡人先告狀？唔該你check清楚有冇執漏嘢，如果我見到唔屬於呢度嘅嘢，我一律會掉！呢度唔再歡迎你！」被稱為花姐的中年女子霸氣但不失禮貌說道。
「哼！」
說時遲，那時快，一輛紅色超跑已停在大門外。
「BB行得未呀！」
「條仆街仔俾咗卅個咋！」
「屌！搞咁多大龍鳳都係呃得嗰卅個？」
“呃咗卅個都唔夠？有冇咁大咬呀？我都係諗住呃兩餐晏仔啫。”
正當盧瀚霆消化剛才的畫面時，憂鬱的背影出現於花園中。那人坐在背著大門的韆鞦上，對著一望無際的大海。
「其實你都幾靚仔吖，又有錢，應該好開心先係架？但點解睇落好似仲慘過我？」
盧瀚霆千辛萬苦終於回到家中，草草喝過一口水，便打開筆記簿，開始整合今天的情報。
目標：安少
性格：行路唔帶眼，大頭蝦，懵，超級豪爽，孤獨？
障礙：木嘴朋友
感情狀況：剛被派帽
合上筆記簿，盧瀚霆開始運算下一步行動。
翌日清晨，盧瀚霆抬著拆裝的單車，乘坐輕鐵再轉乘巴士。下車後，踏上重新組裝好的單車，前往目的地。其實他心知這是一個沒有把握的行動，因為他根本未能掌握呂爵安每日的行程，所以他到達目的地後，只能躲在那大樹下。
大約七時，大屋其中一扇窗的窗簾，被一個頂著雞窩般亂髮的人打開，嚇得盧瀚霆心虛地躲得更後。過了半小時，一身深綠色運動服的呂爵安從大門跑出來。盧瀚霆預計，這晨跑沒有兩小時也至少一小時，所以他席地而坐，咬著預備好的腸仔包，享受這優美的野餐。
正當睡魔要接見盧瀚霆的時候，他隱約聽到跑步的聲音，於是瞪大雙眼，拍了臉頰兩下，再循聲音的方向望去。呂爵安真的正接近大屋，但不同於出發的裝束，他已將運動外套繫到腰間，只穿著深灰色背心，露出一對麒麟臂。與此同時，花姐已拿著毛巾在大門外等候。
「唔該花姐！我咪話唔使專登等我囉…」呂爵安取過毛巾，在花姐額頭送上一吻，「我又唔係三歲細路仔，你休息下好過啦。」
「妖！成身臭汗𡃶埋嚟！」花姐面帶甜笑協助呂爵安抺去頭上的汗水，「你喺我心目中永遠都係三歲嗰個死𡃁仔呀......衰仔！」
呂爵安推著花姐雙肩回轉大屋，「係喇係喇！你最抵𡃶喇！花姐is the best！」
看著呂爵安與花姐的互動，盧瀚霆滿是羡慕。
自己曾幾何時都是父母的掌上明珠，吃飽穿暖從不憂愁；事事總會以他為大前題；遇到挫折總有最強的避風港，母親總會用溫柔的手撫摸他的頭頂，父親亦會用剛強的臂彎擁抱他。
盧瀚霆調節好情緒，繼續觀察大屋的動靜。
日上三竿，呂爵安也沒有踏出過大屋半步。
「嘩……你個人有冇咁悶呀！真係孤獨精！」盧瀚霆沒好氣的攤睡在草地上。
“🎶🎶🎶🎶🎶🎶🎶🎶🎶”
「唔？夢中的婚禮？」一陣悠揚的琴聲由大屋傳出來。
盧瀚霆坐直身子，雙腳屈曲，手肘抵在膝蓋，雙手托著頭，望著呂爵安睡房隔鄰開著的窗，享受這心愛的曲子。
「呢條友彈琴都幾好聽喎…」
「先生？先生？喂！你聽唔聽到？」呂爵安輕輕搖著盧瀚霆的肩膊。
「唔？嘩！！」看到呂爵安近距離的臉，嚇得盧瀚霆向外側滾。
「先生，你有冇事呀？係咪俾人打劫？有冇受傷？」呂爵安站在原地不動。
「err……我…我頭先幫人睇完風水，見呢度幾舒服，所以咪坐下囉，點知舒服得濟瞓著咗。哈哈哈！」盧瀚霆慢慢站起來，拍去身上的雜草。
「哦…原來係咁…我屋企管家以為有人暈咗，所以叫我出嚟睇下，佢啱啱返咗入去諗住攞杯水俾你。」呂爵安指著自己的大屋。
「我冇事呀！唔使麻煩你哋喇！我走先，唔該哂。」雖然是一個大好機會接近對方，但還未計劃好的盧瀚霆怱怱踏上單車離開。
“嚇Q死！”
目標：安少
性格：行路唔帶眼、大頭蝦、懵、超級豪爽、孤獨？精、心地唔錯
障礙：木嘴朋友
家庭背景：管家花姐
感情狀況：剛被派帽 已分手
嗜好：晨跑、彈鋼琴
筆記簿還未合上，盧瀚霆已倒頭大睡。
TBC