Work Text:
江𤒹生有點苦惱，前幾天和楊樂文、王智德一起把邱傲然騙到工作室準備嚴刑逼供，沒想到邱傲然冷靜的搖頭拒絕，只願意把陳卓賢說話複述一次，卻不肯說出他的下落。
提到江𤒹生和June親吻的事，三人有志一同的露出譴責的目光，讓江𤒹生頭皮發麻，急急的解釋自己是被強吻，沒想到楊樂文、王智德一秒就倒轉槍頭。
「虎仔做得啱呀，你個渣男係要受吓教訓。」
「德仔你唔好附和我，我好唔舒服。」
「嗱AK，今舖你又爭唔落嘅，你照直講咪冇事囉，又要瞞住人，講啲唔講啲。」
「大佬呀，咁我驚佢嬲，驚佢唔開心呀嘛。」
邱傲然撥了撥頭髮，擠出一個假笑「你覺得佢而家好開心？」
王智德拍了拍他的肩，語重心長「仲記唔記得我google過追妻火葬場個definition？加油。」
「妖⋯」
江𤒹生已經和陳卓賢一起大半年，現在才沮喪的發現自己連他的朋友、家人也不太認識，不像陳卓賢早已存下楊樂文幾人的電話，更不知道idpt的倉庫在哪裡或者在哪裡寄賣，明明已經下定決心要把陳卓賢追回來，卻發現自己根本不夠了解他，想找人也不知道從何入手。
「唉⋯虎仔又唔肯幫我，可以去邊度搵？」
江𤒹生一邊走一邊唉聲嘆氣，沒有注意到面前有人跑來，硬生生被撞了一下，痛得他差點咒罵出聲。
「小心啲啦大佬⋯」
「Sorry Sorry對唔住唔好意思，你冇⋯⋯係你！」
江𤒹生揉著發痛的手臂，一抬起頭卻有些驚喜「姜濤！」
「我收返句對唔住！哼！」
眼見姜濤一秒變得氣沖沖準備離開，江𤒹生連忙伸出雙手捉住他的手臂「等等先，姜濤你唔好走住。」
「放手呀！我唔想同你呢啲衰人講嘢。」
姜濤用力的甩開他，卻低估了自己的力氣，江𤒹生因為消瘦了不少，輕易就被他甩開，狠狠撞上一旁的欄杆，讓姜濤一下子慌了神。
「我、我好細力咋喎⋯」
江𤒹生按住了腰，忍著痛又拉住了他「我知你好嬲我，但係我真係冇做任何對唔住陳仔嘅嘢，我想同佢解釋清楚咋，你一定知可以去邊度搵佢，你話俾我知啦。」
「我先唔會幫你。」姜濤不敢再推他，但一想到每天強顏歡笑的陳卓賢，還是忍不住生氣「我嗰陣都提過阿哥，佢係都唔聽我講，我一早話咗你係呃佢感情㗎啦！」
「我真係冇⋯」他咬著牙，低聲下氣的懇求著「我真係好愛佢，剩係想要一個機會解釋俾佢聽，我求吓你呀姜濤⋯」
姜濤看著江𤒹生，見他紅著眼眶，咬著唇，似乎自己一拒絕就會流下眼淚，不禁放輕了聲線，下意識就想安慰他。
「喂，你、你唔好喊啦⋯」
「我求吓你⋯我真係好想見返佢⋯」
「⋯雖然阿哥冇話過唔講得⋯但係⋯萬一佢唔想見你，我又講咗，佢會嬲埋我㗎喎。」
「一係你話俾我知佢平時會去邊吖，我日日去等佢。」江𤒹生有些急切，捉住姜濤的手緊了緊「或者佢去開邊頭？我去嗰邊搵，求吓你吖姜濤。」
「⋯咁你唔好俾佢知係我講喎。」
「冇問題！」
「阿哥有時會去間叫Unicorn嘅酒吧唱歌，不過唔知佢幾時會去。」
「唔緊要，我日日去等。」終於有機會能再見陳卓賢，江𤒹生鬆了口氣「多謝你呀姜濤。」
姜濤本來不想幫江𤒹生，但他知道陳卓賢其實也很思念他，偶爾會看到他盯著手機出神，姜濤曾經偷偷走到背後偷看，發現陳卓賢的手機桌面仍然是江𤒹生的照片，現在又看到江𤒹生低三下四的求自己，才忍不住鬆口。
「你唔好再搞到阿哥咁傷心啦，佢真係好鍾意你㗎，分咗手日日都唔開心⋯」
「我知道㗎啦。」江𤒹生有點鼻酸，低下了頭點一點「我會氹返佢開心。」
「咁你記得唔好俾佢知係我講喎，記得呀。」
「放心啦。」
和姜濤分開後，江𤒹生馬上掏出手機搜尋酒吧的地址，並沒有留意到姜濤在轉角處偷偷看著自己。
姜濤伸出頭看了看，見江𤒹生低著頭看手機，忍不住用手拍了拍胸口，鬆了一口氣。
「喺度睇咩呀？」陳卓賢的聲音突然在身後響起「唔係約咗餐廳等咩？喺隔離街喎。」
「哥！」自覺出賣了陳卓賢，姜濤心虛的摟住了他的手臂，下意識不想讓兩人相遇「唔好行嗰邊啦，行呢邊吖。」
「吓？行嗰邊快啲喎。」
「我⋯」姜濤急得冷汗直流，隨口編了個藉口「有個中學蝦過我嘅人喺嗰邊，我唔想俾佢見到我吖。」
最後在姜濤撒嬌的攻勢下，陳卓賢搖了搖頭，還是跟著他繞路，剛好避開了江𤒹生。
接下來幾天江𤒹生都遊走不同的酒吧，他有點後悔當初沒有問清楚酒吧在哪一區，上網一查Unicorn就出現五間不同的Unicorn酒吧，只好一晚跑一間，結果忙碌了整個星期，還是沒能遇上陳卓賢，不能確定是哪一間，相遇的機會簡直微乎其微。
「先生，請你飲杯橙汁吖。」
江𤒹生一抬頭，發現開口的是頂著一頭藍髮的酒保，他低頭看了眼面前的橙汁，彎了嘴角向酒保笑了笑「橙汁？」
「見你好唔開心咁，酒入愁腸愁更愁呀，好易會醉㗎，飲杯橙汁啦，又甜又健康。」
「多謝。」
江𤒹生握住手中的橙汁發呆，身邊突然出現一個高大的人影，下意識抬頭，就看到男人探身，和酒保交換了一個吻，然後逕自走入酒吧深處的工作區，看到江𤒹生一臉呆滯，酒保忍不住笑了。
「你第一次嚟？」
「哦，係呀。」
「唔怪得你個樣咁suprise啦。」酒保溫柔的笑了笑「我叫Jeremy，你可以叫我米米，頭先嗰個係我男朋友Stanley。」
「Jeremy，多謝你杯橙汁，叫我AK得啦。」江𤒹生喝了口橙汁「介唔介意我問少少嘢？」
Jeremy邊純熟的調著酒，邊點了點頭「你問吖。」
「其實⋯你哋唔驚俾人知係gay㗎咩？」見對方抬起頭看向自己，江𤒹生急忙解釋「Sorry我冇心打聽你私隱，只不過我⋯我都有個男朋友，佢好嬲我冇公開，但係我⋯」
「哦～」Jeremy沒好氣的笑了笑「直仔？溝咗條仔又驚俾人知自己有男朋友？其實gay冇罪㗎喎，怕咩人知？」
「我都唔知⋯」江𤒹生對著眼前的陌生人，突然有一種傾吐的慾望「咁我咁多年都鍾意女人，驚俾人笑我中途轉基⋯」
「你有冇聽過，其實每個人都係雙性戀？只不過有啲人愛異性多啲，有啲人愛同性多啲。」Jeremy在他面前放下了一杯藍色的雞尾酒「同主流唔同，就一定係錯㗎咩？」
「我都明⋯」
「咁睇你怕俾人笑，定怕冇咗個男朋友啦。」
江𤒹生拿起酒抿了一口，苦澀得他皺起了眉，Jeremy捂著嘴偷笑「本身Blue Tears唔苦嘅，不過我想代你男朋友教訓吓你。」
「佢已經俾咗個好大嘅教訓我⋯」江𤒹生自嘲的笑了笑「佢唔要我啦⋯」
「噢⋯」Jeremy有點不好意思「冇得摱？」
「我連佢匿咗喺邊都唔知，點摱⋯」
「咁如果俾你搵返佢，你諗住點？」
江𤒹生想起了陳卓賢那雙笑眼，每次大笑都會用雙手擋住臉，笑得東歪西倒；
想起了他那片唇，生悶氣時總會不自覺地扁嘴，像個小孩子一樣；
想起了他身上的痣，每次溫存過後他總愛戳著他胸口上的一顆顆痣⋯⋯
「我會同佢講聲對唔住，然後話俾佢知我有幾愛佢。」